Өткен апталарда көршілес блогтан ислам банкингіне қатысты семинар өтетінін оқыған едім. Сәті туып, Fattah finance ұйымдастырған семинарға қатыстым.

Бұған дейін ислам қаржы құралдары туралы там-тұмдап жинап жүрген деректер Бекжан Толыбайдың (сол компанияда басшылық қызметтердің бірінде еңбек етуде) семинарынан соң, “Қажылық қорлар” деген тың мәліметпен толықты. Бәлкім, біреулеріңіз бұдан хабардар боларсыз. Сондықтан алып-қосарыңыз болса, қуаныштымын.

Малайзия мен Біріккен Араб Әмірлігінде ислами қаржы құралдарының дамуына мұсылмандардың сандарының көбейгендігі түрткі болған. Олар мұсылмандар ақшаны ислами құралдарға құймайтынын байқады. Сөйтіп олар “Қажылық қорларын” дүниеге әкелді.

Қазақстанда ақша сақтайтын қаржы құралдары тапшы. Бар болғаны депозиттер мен сақтандыру компаниялары, зейнетақы қорлары бар. Сондықтан ислам қаржы нарығын дамытқысы келетіндер халқымыздың 60 %-ы мұсылман екенін ескере отырып, Қажылық қорларға (Eng, Hajj fund) баса мән бермек.

“Қажылық қорлар” аты айтып тұрғандай қажылыққа баруға ниеттенгендерге жәрдемдеседі. Олардың бастапқы ақшасын алып, нарыққа жұмсайды. Мәселен, еліміздегі бір компания қажылыққа барғысы келетіндердің ақшасына халал ет өндірісіне құймақшы. Ол жердегі халал етті сыртқа экпорттап, табысты қажылыққа барғысы келетіндергі қайтарады.

Әрбір амал ниетке байланысты деген түсінік бар. Соған сәйкес қажылыққа баруға ниет еткен адамның амалы сол “Қажылық қорына” қатынасынан да білінетін тәрізді. Малайзияда егер қажылыққа бару нәсіп етпесе, ол ақшаны туысқандарына береді екен. Немесе мұрагерлік салт бойынша бөлінеді.

Сурет СС рұқсаты негізінде transposition есімді Flickr қолданушысының мұрағатынан алынды