Редактордан: Теледидар идеологияны қалыптастыратын мықты құрал. Қазақстанда балаларға арнап, арнайы “Балапан” телеарнасы ашылса да ол өзін ақтамай отыр дейді біздің авторымыз Мәншүк Ахметова. Төмендегі жазба Мәншүктің теледидар арқылы балаларды тәрбиелеу тақырыбына арналған.

Бұл әнді ең бірінші рет 3 жасар інімнен: “Ауырмайды жүрек, ауырмайды” деп айтқанда: “О, Алла, мына өмірге кеше ғана келген баланың мынаусы несі?” деп шошып кеттім. Барып тәтемнен сұрасам: “Ой, ол клип ХитТВ-дан беріліп жатыр. Қайрат Нұртас айтады. Соны жаттап алған ғой”,-деді. Сонда барып түсіндім. Қазір бәрі осы әнді былайша айтқанда “өліп” тыңдайды ғой, ал мен сол інімнің аузынан естігелі бұл әнге деген махаббатым оянбай-ақ қойды. Әнші хит үшін осындай ән таңдап жатса, ал кішкентай балалар бұл әндермен уланып жатыр деп айтуға болады.

Бүгінде балалар көретін телеарналардың аздығынан бүлдіршіндер жоғарыдағы әндерді тыңдап, өсіп, уланып жатыр.

Әрине, биліктегі ағаларымыз балалар үшін деп “Балапан” телеарнасын ашып берді. Әйтсе де, ол республиканың барлық өңіріне тарамайды. Оны спутник арқылы ғана көру мүмкіндігі бар. Спутникті бір осы “Балапан” телеарнасын көруге қосатын болсақ, қалған жүздеген ресейлік телеарналарында балаларға арналған он шақты арна балаларға берілген.

Ал қазақша көргісі келетін балалар бәрібір сол “Балапаннан” гөрі, ресейлік арнадағы “Спандж Бобты”, “Өрмекші адамды” көруге ынталы. Себебі, “Балапан” арнасы тек қайталаумен ғана шектеледі. Ал балалар басқа арнаға ауыспас үшін, біріншіден, “Балапан” арнасын республикаға тарауына мүмкіндік жасау. Екіншіден, сол арнада берілетін мультфильм немесе ойындарды күн сайын жаңалап отыру.

Көп ата-аналар балаларына баланы болашағым деп қарамайды, мынау не деген сұрғына не ұрсып жауап береді, не мүлде жауап бермейді. Көшеде жаттап келген боқтық сөздерге тиым салудың орнына, керісінше соны қайта-қайта айтқызып отырады. Бұл да баланың болашақта қалыптасуына кері ықпалын тигізеді. Ол үшін, ата-аналар балаларына күнде жақсы тақпақтар мен ертегілерді айтып отыру керек.

Осы күні балалар тек жоғарыдағы әндерді ғана емес, шет ел әндерінінің атыс-шабыс, жалаңаш клиптерін көріп өсуде. Бала теледидардағы көрген қимыл-әрекеттерін айна-қатесіз қайталайды. Ондай олқылықтарды болдырмас үшін, музыкалық арналар күндіз дәстүрлі қазақ әндерін, жақсы эстрадалық әндерді беріп, ал кешкісін, не балалар ұйықтаған уақытта барып шет ел әндерінің клиптерін беру керек.

“Бүгінгі балалар бала емес, “бәле” дейтін үлкендердің айтатыны бар. Бала “бәле” болмас үшін, ата-аналар бала тәрбиесін жауапкершілік деп түсіну керек.