Google компаниясының өкілі Алматыға келді. Дәлірек айтқанда Google-дың google map жобасы бар. Бұл жоба Google жүйесіндегі елді-мекендерді анықтауға арналған. Бүгін өткен Google Map Almaty шарасы Алматы қаласының көрікті де, маңызды жерлерін интернетте белгілеп, көрсетуге арналған.

Аталған шараға қазірдің өзінде жетпістен аса адам қатысты. Арасында Google корпарациясында 2007 жылдан бері қызмет етіп келе жатқан қазақстандық Рүстем Арзымбетов те бар.

Рүстемнің айтуынша Қазақстандағы күллі интернет іздеу жүйесінің 60 пайызы қазір Google-дың үлесінде. Одан кейінгі орында Ресейдің Яndex және mail.ru иеленген.

Рүстем қазір Google-дың штаб пәтері орналасқан Сан Франциско қаласындағы Mountainew қаласында тұрады. Әлемдік технология саласындағы олимпиадалардың жүлдегері атанған Рүстемді Google компаниясы жұмысқа шақырған екен. Телефон арқылы болған сұхбатта: “Қазақстанның нарығы осы аймақта өте тез дамып келеді. Сондықтан да Гугул қазақ нарқындағы өзінің үлесін қалай да кеңейтуді қалайды” дейді.

Қазақстан жастарының кәсіпкерлері орталығы осы шараны алғаш рет қолға алып отыр. Орталықтың мүшесі Гүлжан Ақтілеу:

“Интернетте Алматы қаласындағы маңызды ғимараттар мен мекендер нақты көрсетілмеген” дейді.