Осыдан бір апта бұрынғы Қарағандыда бас қосқан әлем кәсіпкерлерінің жиналысының жаңғырығы бізге енді жетіп жатыр. Қазақстанның жетекші индустриялық кәсіпорындары шоғырланған аймаққа әлемнің түкпір-түкпірінен бай-манаптар келіп, Қазақстанның қай саласына ақша құйып, пайдаға кенелуге болатынын талқылаған. Кездесуден қоржыны толып қайтқандардың бірі ирандықтар екен.

Бұл туралы Тегеранның экономикалық басылымы tehrantimes.com «Иран Қазақстандағы тұңғыш магистральді салуға қатысады» атты мақаласында жазады.

«Астана мен Щучинскті жалғайтын ұзындығы 224 км. болатын жол Қазақстан үшін ерекше маңызды болып отыр. Жаңа магистрал арқылы күніне 40 мың көлік жүретін болады».

Бұл жолдың жұмысын үш Қазақстандық және екі шетелдік компания бірлесіп атқармақ.

Каспийдегі мұнай барлау жұмысына қатысы бар шетелдік компаниялардың бұған дейінгі Қазақ үкіметі жүргізіп отырған ойын ережелеріне наразы екендіктерін ашық білдірген болатын. Үкіметтің жаңа қаулысы ҚазМұнайГазға мұнайды барлау жұмысында белгілі бір артықшылықтар жасаған. Осы уақытқа дейін Қашағандағы жұмысты бастау жөніндегі жаңа келісім-шарттарға қол қоймай отырған компаниялар осы аптада Шевронның жаңа мұнай құбырын салу жөніндегі Қазақстанмен келісімінен соң тіріліп кетті. Мәселе, Каспийдегі мұнайды енді Баку-Тбилиси-Джейхан мұнай құбырына қосатын Ескене-Құрық Каспийдің оңтүстік құбырының салынуында болып отыр.

«Қазақстан Каспий арқылы мұнай экспорттайтын мұнай құбырының құрылысын бастамақшы» атты мақалада Әзірбайжандық capital.trendaz.com сайтының журналисті

«Жалпы құны 1,5 млрд. АҚШ долларына бағаланған құбыр келешекте 23 млн. тонна қазақ мұнайын тасымалдайтын болады. Нәтижесінде «Қашаған» кенішіндегі мұнай құбырының өнімділігі 56 млн. тоннаға дейін артады»

деп жазыпты.
Аталған тақырыты өрбіткен келесі chron.com сайтының экономикалық жаңалықтар бөлімі «Шеврон Қазақстанға өз мұнайын Ресейді айналып өтіп тасымалдайтын құбыр салып беруге жәрдемдеседі» деген сарында сараптамалық мақала жариялаған.
Мақалада

Ендігі жаңа көпір Қашағанға Құрық арқылы Әзірбайжанға тасымалдауға мүмкіндік береді. Кейін БТЖ (Баку-Тбилси-Джейхан) арқылы мұнай танкермен Түркияға жөнелтілмек»

деген сөйлемдер жазылған.
Батыс инвесторларының аталған құбырға ерекше мән беріп отырғандарын түсіну оңай. Себебі бұған дейін қазақтың мұнайын Ресей өз уысында ұстап, күллі Орталық Азия елдеріне өзінің билігін жүргізгісі келетін. Ендігі кезекте Шеврон компаниясы қазақ мұнайын Еуропаға тасымалдаудың төте жолын салуға күш салып отыр.