Сәтбаевта үйде жүрмін. Көшеде көпшілігі маска киіп алған. Үйде жеңгемде де маска. Ағада да біреуі бар. Қарап отырсам, тек менде ғана жоқ екен. Кішкентай қалада адамдарға мәлімет тез таралады ғой. Содан тұмаудан сақтанамыз деп бәрі маска алыпты. Енді дәріханада маска жетіспейді. Маска түгілі тұмауға қарсы дәрілерге де сұраныс күшті. Қарап отырсам, бұл дәрілер Ресейден алынады екен. Әйтеуір үйге қонақтап келгендердің айтатын әңгімесі де сол. Қызық.

-Бәлен жерден үш маска алдым. Таңертең ертемен тұрып, Айконайды жібергенмін. Соңғысы тиіпті.

- Кеше мынадай дәрі іштім. Жақсы екен.

- Базарда масканы 50 теңгеден тығып сатады екен т.с.с.

Неге ғана бал мен қойдың майын пайдаланбайды екен деп те ойлаймын. Сөйтсем, қазір қойдың емес, аюдың майын қолдану сәнге еніпті. Жұрт соны жақсы деп жатыр. Қойдың майымен емделдім дегеннен гөрі, аюдың майымен емделдім деген әлдеқайда маңыздырақ естіледі ғой

Бұл аюдың майы да солтүстіктегі көршімізден келіп жатқанын ішім сезеді. Ауырсақ та көршіміздің экономикасына үлес қосамыз.

Шындығында тұмау қазір бұл жақта өршіп тұр екен. Аяғынан тұра алмай жатқандары бар. Қарағанды облысында мектептерде маска кию міндеттелген.

Кішкентай қалада үнемі солай ғой. Ауырмасаң да, көптен қалмас үшін сен де маска аласың. Әңгімеге араласып отыру үшін сен де дәріханаға барып, дәрі сатып алып, әсерлеріңмен бөлісесің.

P.S. Күні кеше отыз шақты қойымен, төрт-бес сиырымен ауылда отырған көке-тәтем келді. Жырақта екі ғана үй екен. Тың. Күні бойы қора-қопсы шаруысымен жүреді. Жұрт олардан: “Тұмаудан амансыңдар ма?” деп сұрапты. Күліпті. “Бізге тұмау қайдан жұқсын. Қасымызда тірі жан жоқ. Сиыр мен қойдан  басқа” дейді.