Құрбан айт қарсаңында Малайзияның бірнеше сайттары қазақ қызының шақалақты қоқысқа тастап жатқан сәтінде ұсталғанын хабарлады. Жан түршіктірер хабарды оқып отырып, “Ардан безген қыздарды шетелге жібермегеніміз дұрыс” деген ойға келдім. Бірақ түптеп келгенде мәселенің мәнісі тереңде жатқанын ұқтым.

Сингапурда білім алып жатқан 20 жастағы Қазақстан азаматшасы өз баласынан құтылу үшін Малайзияға келді. Себебі Сингапурда бұл қылмыстың жазасы ауыр.

деп хабарлайды (eng) Bernama агенттігі.

Қыз бала Малайзияға досының пәтеріне екі күн бұрын келіп, Дүйсенбі күні баланы пәтерде жалғыз өзі босанған. Одан соң шақалақты пластик қалтаға салып, үйдің іргесіндегі қоқысқа апарған. Баладан құтылып, пәтерге еніп бара жатқан сәтінде полицейлер оның шалбарынан қанның ізін байқап тоқтатқан. Келіншек бұл жайтты етеккір мерзімімен түсіндіргенімен, кейін емханадағы тексеруде ұл баланы дүниеге әкелгенін мойындады

дейді келесі бір мәліметтерде (eng).

Жоғарыдағы хабарларда қыз баланың тек Қазақстанның азаматы екені аталған. Сингапурда қай университетте, қандай бағдарлама бойынша білім алып жатқаны көрсетілмеген.

Мемлекет “Болашақ” бағдарламасы арқылы 3000 студентке жыл сайын шетелдің алдыңғы қатарлы оқу орындарында халық ақшасы есебінен білім алуға жіберуде. Десе де осы уақытқа дейін “Болашақ” шәкіртақысын иеленген жастардың шетелде түрлі қылмыстар жасап, ел атына кір келтіру оқиғалары кездесіп жатыр. Америкаға “Болашақпен” білім алған Әсел есімді қыздың кісі өліміне қатысты деп сотталып, біраз уақыттан соң барып қайта ақталғанын дүйім жұрт жақсы біледі (рус). Бұл жайт шетелге оқуға жіберуші жастармен ала дайындықтардың дұрыс жүргізілмегендігін көрсетеді деп ойлаймын. Сондай ақ қыз балалардың шетелде білім алып жүріп, шетел азаматымен отау құрып, ел ақшасын ысырап етіп жатқан оқиғалар да ұшырасуда.

Youtube ке Сингапурда оқып жатқан студенттер жайлы бейнехабар орнатқан aikokzsg өткен жылы 30-32 студенттің білім алып жатқанын жазған екен.

Шетелде білім алып жатқан қыз баланың баладан бас тартуына қатысты бірнеше жорамал жасауға болады:

1. Үй ішіне, туыс-туғаннан шетте жүріп бала тапқанын жасыру
2. Карьераны ойлағандықтан, ерте жаста (20 жаста) ана болуды қаламау
3. Денсаулығының нашарлығы
4. Иманның жоқтығы.

Қалай десек те, туған баласынан бас тартып, оны қоқысқа апару адамшылық емес. Бұл шетелде білім алып жатқан қазақ қызының жасаған бізге белгілі бір ғана қылмысы. Осындай оқиғалардан соң, “қызға қырық үйден тиымның” кеткеніне налисың. Отаннан жырақта жүріп, білім алу оңай емес екендігі түсінікті. Шетелдегі қазақ студенттерінің өз ұйымдары, психологиялық жәрдем берер орталықтар болғаны дұрыс-ау деп ойлаймын. Әйтпесе, әлі азаматтық көзқарасы қалыптаспаған, өмірдің қатал сынын түсінбеген өрімдей жастарды (20 жастағы) шетелге оқуға жіберу қажет емес болар.