Қытайлық ата-ана қазақ балабақшасының бағыты жақсы деп, Қазақстандағы балалардың не себепті ақылды болатынына үңілуде.

Шанхайдың «Shanghai Daily» басылымы қазақ балабақшаларының жұмысына оң баға беріп, қытай балабақшалары баланың санасына кері әсер етеді дейді. Біраз өмірін Қазақстанда өткізген қытайлық журналист Қазақстандағы және Шанхайдағы балабақшаны салыстырып, баласының бойындағы өзгерістерді баяндайды.

«Shanghai Daily» басылымы Қазақстанда біршама уақытын өткізген қытайлықтың пікірін жариялапты. Зоң Лей есімді журналист Қазақстандағы балабақша жүйесі мен Шанхайдағы балабақша жүйесін салыстырған. «Мен өзімнің баламды әуелі Қазастандағы балабақшаға бердім. Кейін жаз айында үш ай бойы Шанхайдағы балабақшаға барып жүрді. Бұл орайда Қытай мен Қазақстандағы бастауыш сынып алдындағы білім беруді салыстыруға болады» дейді журналист.

Шанхайдағы балабақшаларда бүлдіршіндергі кітаптардан көп нәрсе оқытып үйретеді. Математика, Қытай әдебиеті, ағылшын тілі сабақтары жүргізіледі. «Менің үш жастағы ұлымның құрдастарына ағылшын тілінде сандар мен әріптерді жазуды үйреткенін көріп, таң қалдым» дейді. Шанхайдағы кейбір қытайлық ата-аналар балабақшадан соң ән күй, би үйірмелеріне балаларын жаздырады екен. «Менің ұлым шанхай балабақшасына барып жүріп, қытайша өлең оқып, ағылшын тілінде ұйқастар құрастырып, сандар мен әріптерді жаза алады» дейді Зоңг.

«Ал Қазақстан балабақшасында менің ұлым күні бойы ән салып, би билеп, түрлі жаттығулар жасайтын. Ол балабақшада оларға өз заттарын ұқыпты жинауды, таза жүруге баулитын. Көшеде жапырақтар жинап, оларды тасып, аққала қалап, жеміс жидектерден әртүрлі жануарларды жасап ойнайтын. Ұлым бұл жақта жүріп, біраз тақпақ жаттады. Әрі орысша тілі шықты»,

- дейді қытайлық журналист.

Мақалада қытайлық балабақшада тәрбиеден бұрын білім берілетіні баса айтылады. Бұл жайт кейін баланың миына үлкен салмақ салып, уақыт өте келе баланың білімге деген құштарлығын жояды екен. Бұл сөзіне дәлелді шетелдік журналист BBC арнасының зерттеулерімен бекітеді. «Баланы Қазақстандағыдай ойнатып жүріп, оның бойында әртүрлі қызығушылықтарды қалыптастыру дұрыс. Себебі үш жастағы бала ойнауы керек» деп түйіндейді өзінің ойын қытайлық журналист Shanghai Daily басылымының осы аптадағы санында.

Сурет СС рұқсаты негізінде Flikcr торабының wwworks мұрағатынан алынды.