Алматанын автобустарын алматалыктар гана айдоого тийиш. Мындай пикирин кечээ КТК каналынан Алмата жол полиция башкармалыгынын начальниги Мукан Досымбаев билдирди. Ал түштүк борбордун коомдук транспортун айдатуу маселесинде мигранттарга эле эмес, Казакстандын башка шаарларынын жашоочуларына да ишенбей турганын белгиледи.

Мукан Досымбаев бул норманы атайын мыйзамга киргизүүгө аракет кылууга ниети бар экенин да белгиледи. Анын айтымында, статистика боюнча карап келгенде башка жактан келген айдоочулар, айрыкча Шымкент, Тараз шаарларынан, ошондой эле Кыргызстандан келген айдоочулар жол эрежесин көбүрөөк бузат.

Бүгүн буга байланыштуу салтуу болуп калган атайын “Автобус” операциясы өз ишин баштады. Бир нече күн бою полициялар коомдук транспорттун айдоочуларын өзгөчө көзөмөлгө алат.